Goking misuporta sa 26th Consumer Welfare Month

HUGOT nga gipaluyohan ni Konsehal George Goking ang pagpahigayon sa ika-26 nga Consumer Welfare Month karong bulan sa Oktubre 2023 inubanan sa Cagayan de Oro City Price Coordinating Council (CDO-CPCC).

Lakip sa mga gihimong kalihokan pahaum sa kasaulogan mao ang pagpahigayon og random nga pagsusi sa mga timbangan sulod sa merkado sa Cogon kuyog ang panon sa CDO-CPCC, Department of Trade and Industry-Misamis Oriental Provincial Office, City Economic Enterprises and Business Development Administration (CEEBDA) ug City Finance Office.

Niini, mokabat sa 16 ka mga talad sa merkado ang na-calibrate ang mga timbangan samtang tulo ang nakompiskar human nasutang adunay dipirensya ang timbangan. Gisusi usab sa grupo ang mga business permits aron matino kun ang gibaligya nahaum sa panugot nga gihatag sa gobyerno.

Dugang pa, nagpahimutang ang grupo sa Timbangan ng Bayan dinha sa entrance sa merkado sa may dalan J.R. Borja-Yacapin aron makuha sa mga konsumante ang tukmang timbang sa ilang mga pinalit.

Si Goking namahayag nga gikinahanglan nga mapanalipdan ang mga konsumante sa tanang panahon ilabina ang gahom o’ “purchasing power” sa ilang bayad.