Goking misugyot sa mga alternatibong kapanginabuhian

SI Konsehal George S. Goking, chairman sa komite sa Trade & Commerce, naglaum nga bisan sa kasamtangang kahimtang sa ekonomiya ug hulga sa kalinaw ang kooperasyon ug pagsabot sa tanan ang gikinahanglan.

Dili malalis nga hilabihan ang pagsaka sa presyo sa mga palaliton tungod sa pagsaka sa presyo sa produktong petrolyo ug kini angayan nga mapangandaman sa katawhan.

Si Goking mipasabot nga ang paglantaw ug pagdaginot sa pundo nga anaa sa panudlanan sa matag usa gamiton ug tagaan sa prayoridad ang pagkaon. Dugang pa, siya misugyot sa tukmang paggamit sa mga adunay sakyanan ug mogamit sa ubang alternatibo aron malikayan ang paggamit sa gasolina ug uban pa.

Gikinahanglan usab ang pagpatuman sa mga livehood programs nga haum sa panginahanglanon karong panahona aron matabangan ang tanan sa ilang kapanginabuhian. Gani, angayan nga masuportahan ang backyard gardening ug pagtanum sa mga lagutmon kay kini dako og ikatabang sa inadlaw adlaw nga panginahanglan.

Angayan nga magkahiusa ang tanan aron mahatagan sa insaktong solusyon ang problema karong panahona, panawagan ni Konsehal George Goking.