Goking misugyot sa makuting pagtuon sa hangyong omento sa suhulan

GIKINAHANGLAN pa ang dugang pagtuon sa hangyong omento sa suholan. Mao kini ang pamahayag ni Konsehal George S. Goking, chairman sa komite sa Trade and Commerce. Ang konsehal mipasabot nga iyang nasabtan ang kahimtang sa mga mamumuo nga nagkinahanglan sa maong omento aron madugangan ang kinitaan. Apan sa kasamtangang panahon hinay hinay pang mibangon ang ekonomiya ingon man ang pagpanumbalik sa pipila ka mga negosyo ug ang omento sa suhulan karong nga panahon dako kaayo og epekto sa pagpanumbalik sa mga negosyo, dugang ni Goking. Ang mga negosyante wala pa totally makabangon gumikan sa pandemya nga padayong nasinati sobra na sa duha ka tuig. Gani, ang uban nagpabilin nga sirado ilabina kadtong mga gagmay nga mga negosyante. Sa bahin usab sa mga dagkong negosyo sila nagpadayon sa ilang negosyo taliwala sa nasinati nga pagka-alkanse aron makatabang sa kagamhanan kay kun mawad-an sa kapanginabuhian ang mga empleyado dako gihapon kini nga problema sa katilingban, dugang sa konsehal. Dili nato mahimong ipugos ang omento sa suholan kay anaa pa ang tanan sa economic recovery ug ang posible nga mahitabo posibleng magtangtang pa og mga empleyado o’ manira ang mga establisamento, pamahayag ni Konsehal George S. Goking.