Goking misugyot mapahigayon public hearing sa gisugyot nga bag-ong Comprehensive Land Use Plan (CLUP)

GIKINAHANGLAN nga makonsulta ang katawhan ug mga negosyante sa gisugyot nga bag-ong Comprehensive Land Use Plan (CLUP) sa dakbayan sa Cagayan de Oro. Kini ang giluwatan ni Konsehal George Goking, Chairman sa Komite sa Ways and Means human gipresentar ngadto sa konseho ang CLUP niadtong miaging adlaw.

Gibutyag nga ang CLUP sa dakbayan nagtutok sa physical land use, social, ug economic development nga mohaum sa tibuok rehiyon. Ang City Planning and Development Office (CPDO) maoy gitahasan sa pagtino sa tukmang gamit sa kayutaan dala ang paglantaw sa urban growth, paglambo sa imprastraktura, environmental conservation, ug community welfare. Ang pagtuki sa CLUP nunot sa tinguhang ma-update ang zoning ordinances sa dakbayan.

Niini, si Goking mipasabot nga gikinahanglan ang panagtambayayong sa tanang sektor sa katilingban ilabina sa mga negosyante aron dili magkatag-katag ang mga negosyo.Dugang pa mao ang konsiderahon sa dagan sa trapiko, sistema sa panubig ug uban pang mga pasilidad sa tinguha nga makahasol sa mga negosyante.