Goking mipasalamat sa pagkunhod sa presyo sa gasolina

DAKO ang pasalamat ni Konsehal George S. Goking, chairman sa Komite sa Trade and Commerce, human ang Petron Corporation mipakunhod sa presyo sa produktong petrolyo sa ilang tanang outlet sa tibuok nasud.

Sa miaging mga adlaw miabot sa P69.00 matag litro ang presyo sa gasolina ug miubos na kini ngadto sa P60.00 na lamang.

Mahinumdoman nga sa miaging tuig ang komite nga gidumala ni Goking mipahigayon og tigom gumikan sa reklamo nga gipaabot sa pipila ka nagpakabanang molopyo sa syudad human namatikdan ang magkalahi nga presyo sa gasoline stations sa ilang baligya matag litro sa gasoline.

Gikalipay ni Goking ang pagkunhod kay dako kaayo kini og epekto sa presyo sa tanang palaliton ilabina sa pagkaon.

Ang katawhan padayon pa nga nag-antos sa kalisod tungod sa pandemya nga sa kasamtangang nagpabilin pa. Gikinahanglan lamang ang pagsinabtanay alang sa kaarangan sa tanan, panapos ni Konsehal Goking.