Girlie subling motuki sa sugyot mapalig-on Halal industry sa CDO

Subling tukion sa komite sa social services ni Girlie Balaba sa tigom karong alas 2 sa hapon ang sugyot balaodnon nga magpalig-on ug magpalambo sa halal industry dinhi sa dakbayan.

Ang maong sugyot mag-require sa tanang establisamento nga nagbaligya og mga pagkaon ug ilimnong halal pagpahimutang niini lahi sa uban pang mga paninda, display section ug halal lanes ekslusibo alang sa mga halal foods ug beverages.

Niini, giaghat usab ang pagbutang og prayer rooms ug Qiblah marking sa tagsa tagsa ka mga establisamento.

Ang sugyot naglatid og multa ngadto sa masapong magbaligya og karne o’ processed meat products gikan sa mga mananap nga namatay gumikan sa sakit, nahikogan o’ nahulog ug uban pang pamaagi kun wala naglangkob sa pagmatansa; pagpatay sa mananap nga dili makatarunganon; dili saktong pagselyo sa halal products, pagsagol sa mga halal ug dili halal products ug pagbutang og halal nga logo sa mga produktong lokal nga dili halal certified.

Nunot niini, mao ang pagpahamtang og P2 mil nga multa alang sa unang kalapasan, P3,500 sa ikaduha ug P5 mil sa ikatulong kalapasan.

Ang sugyot balaodnon nga giduso nila ni Konsehal Girlie Balaba ug Ian Mark Nacaya gitinguha sa pagpalig-on sa panagtambayayong tali sa mga ahensya sa gobyerno, lokal nga kagamhanan, sektor sa mga magpapatigayon ug uban pang stakeholders aron makab-ot ang dugang mga kahigayonan alang sa malahutayong ekonomiya sa halal.

Ang tigom gipaabot tambongan nila ni Konsehal Nacaya, Malou Gaane, Edgar Cabanlas, Suzette Magtajas-Daba, Jay Pascual, Imee Rose Moreno, James Judith II ug Bise Mayor Bebot Rodriguez.