Girlie Nangusog Mapalapdan Gitunol nga Ayuda sa PWDs

Atong kaakuhan nga matabangan ang mga Kagay-anong adunay kabilinggan sa panglawas pinaagi sa pagtunol kanila sa angayang suporta nga magpagaan sa ilang mga kinabuhi.

Mao kini ang gibarugan ni Konsehal Girlie Balaba, chairman sa komite sa social services, atol sa sesyon sa konseho niadtong Lunes nga gidumala ni Bise Mayor Bebot Rodriguez.

Matod ni Balaba nga segun sa Magna Carta of Persons with Disabilities (PWDs), lakip sa mahimong matunol nga serbisyo sa gobyerno mao ang paghatag og insentibo sa mga nag-atiman ug kuyog nga nanimuyo sa mga PWDs.

Niini, siya misugyot sa paghatag og social pension ngadto sa mga kabus nga PWDs ug ilang mga pamilya. Iyang gibutyag nga sa talamdan sa mga PWDs sa syudad sa tuig 2018-2020 adunay 5,213 ka mga PWDs ang dakbayan ug niini, 2,564 ang nalista nga anaa sa low income families kon mga kabus.

Makahatag pa kita og dugang kahigayonan sa mga Kagay-anong PWD pinaagi sa social pension sama sa kasamtangang gitunol sa gobyerno sa mga hamtong, dugang ni Balaba.

Gani, si Mayor Klarex Uy mipadayag usab sa iyang suporta ngadto sa mga kabus nga PWDs, sumpay sa konsehal.

Nunot niini, siya nanawagan sa kadagkoan ug mga kawani sa City Social Welfare and Development sa pagpalapad sa kampanya pag-abag sa mga PWDs ilabina ang pag-ila sa mga kabus kanila.

Konseho uyon pag-convert sa coastal roads gikan sa “city roads” ngadto sa “nat’l roads”

Agig suporta sa tinguha nga makunhuran ang problema sa trapiko sa dakbayan, ang konseho sa syudad sa sesyon niadtong Lunes nga gidumala ni Bise Mayor Jocelyn Rodriguez misagop sa resolusyon nga nag-endorsar ug nagpadayag og pag-uyon sa laraw pag-convert sa coastal roads gikan sa city roads ngadto sa national roads.

Lakip niini mao ang Cagayan de Oro Coastal Bypass Road gikan sa barangay Bonbon paingon sa barangay Bulua nga adunay gilay-on nga 4.8 kilometro ug national highway coastal road Puntod section paingon sa Iponan Section alang sa unang legislative district samtang sa ikaduhang legislative district naglakip sa 4.8 kilometro nga gilay-on gikan Gusa paingon sa dalan Julio Pacana-Kauswagan Bridge section, national highways coastal road Puntod section.

Ang maong lakang subay sa hangyo ni Engr. Gabriel Guinitaran, OIC District Engineer sa Cagayan de Oro City 2nd District Engineering Office sa Department of Public Works and Highways (DPWH-10) nga mapalabang ang usa ka resolusyon alang sa maong lakang.

Giingon nga ang conversion sa coastal road gikan sa city road ngadto sa national road dako og ikatabang sa kagamhanang lokal tungod kay ang nasyonal nga kagamhanan mao na ang moabaga sa mga galastohon sa pagmintinar gawas sa pagpalapad sa inter-regional ug inter-provincial linkages alang sa dugang kalamboan ilabina sa ekonomiya sa syudad.

Ang resolusyon nga gipalabang sa konseho alang sa maong katuyuan gipaluyuhan sa komite sa public works ni Konsehal John Michael Seno ug komite sa pamalaod ni Konsehal Ian Mark Nacaya.