Girlie misugyot matunol socialized pension sa PWDs

Usa sa maghatag kanila og kapasidad sa kinabuhi mao ang patas nga kahigayonan sa serbisyong gitunol sa kagamhanan.

Mao kini ang gibarugan ni Konsehal Girlie Balaba sa iyang pagduso sa sugyot ordinansa nga maghatag og socialized pension sa mga pamilyang kabus nga adunay kabanay nga may kabilinggan sa panglawas ug sa kinabuhi.

Siya miingon nga ang maong sugyot maghatag og kahigayonan sa mga nagdumala ug nanerbisyo sa gobyerno nga malantaw ang kinabuhi sa tanang katawhan ilabina ang mga persons with disabilities (PWDs).

Taliwala sa ilang mga kabilinggan padayon silang naninguha nga makab-ot ang ilang mga damgo sa kinabuhi. Tinuod, adunay makaangkon apan aduna usay maglisod sa pagkab-ot sa ilang mga tinguha gumikan sa kapobrehon, pasabot ni Balaba.

Niini, ang konsehal mihangyo nga masuportahan sa iyang mga kauban sa konseho ang balaodnon tungod kay gikinahanglan kini sa katawhan. Basi sa listahan sa DSWD ug City Planning Office adunay 2,564 ka mga PWDs sa syudad nga nasakop sa mga kabus nga pamilya ug kini sila ang nanginahanglan sa pag-abag sa kagamhanan.

Kun atong magahinan ug matunolan sa socialized pensions kining mga kabus nga pamilya sama ra nga atong giprotektahan ang kaayuhan sa mga marginalized sectors, panapos ni Konsehal Balaba. (Text by JNortiza/photos by JRGalano/SP)