Girlie mipasalamat sa tanang misalmot sa Mega Job Fair 2022

DAKO ang pasalamat ni Konsehal Girlie Balaba, chairman sa Komite sa Labor and Employment, sa tanang misalmot ug miabag aron maangkon ang kalampusan sa nagpadayong Mega Job Fair 2022 dinha sa USTP Gym karong adlawa.

Ang kalihokan pahaum sa ika-120 ka tuig nga pagsaulog sa Adlaw sa mga Mamumuo sa umaabot Mayo 1, 2022.

Nasayran nga kapin sa 80 ka mga kompanya ug daghang kahigayonan sa panarbaho ang gitanyag alang sa mga nangita og trabaho.

Kini ang unang face to face mega job fair dili lang sa dakbayan kun dili sa tibouk rehiyon 10 sukad sa pagsugod sa pandemya niadtong tuig 2020.

Daghang naghulat nga kahigayonan sa panarbaho sa maong kalihokan ug kini usa sa mga paagi nga mahaw-as sa kalisod ang atong katawhang nawad-an sa kapanginabuhian sa pagsugod sa pandemya, pamahayag sa konsehal.

Ang kalihokan taman pa sa alas 5 karong hapon ug ako nag-aghat sa mga nangita og trabaho pagdalikyat sa USTP Gym karong adlawa, panawagan ni Konsehal Girlie Balaba.