Giingong wala makadawat sa allowance nga mga ISDA, tutokan sa komite ni Konsehal Daba

GITIN-AW ni Konsehal Suzette Daba, chairman sa Komite sa Edukasyon sa konseho, nga tutokan sa iyang komite ug sa mga hintungdan buhatan sa city hall ang giingong mga iskolar sa dakbayan (ISDA) nga wala pa makadawat sa ilang allowance.

Kini ang reaksyon sa konsehal sa special report ni Konsehal Imee Moreno sa sesyon sa konseho niadtong Lunes nga gidumala ni Bise Mayor Bebot Rodriguez mahitungod sa mga iskolar nga hangtod karon wala pa makadawat sa ilang allowance.

Si Daba mibutyag nga gikan sa pagsugod sa klase, quarterly ang pagrelease sa allowance kini subay sa nalatid sa kontrata sa scholarship tali sa Siyudad ug sa tinun-an nga ang stipend ihatag kada quarter.

Gipasabot ni Daba nga ang first year college nga mga iskolar mamahimong makadawat na sa ilang unang quarter nga allowance kay kamolo na og proseso Kadtong second year pataas, magdepende kini sa ilang pagrenew sa kontrata ug hangtod makumpleto ang ilang pagsumite sa grado nga usa sa kinahanglanon aron sila makadawat sa allowance.

Giklaro sa konsehal nga gikinahanglan gayud ang ilang mga grado kay adunay pipila nga mga iskolar nga human nakadawat sa allowance, wala na nagpadayon sa ilang pag-eskwela.