Gihan-ay nga mga proyekto sa Brgy. San Simon mapatuman na

PWEDE nang ipatuman sa Barangay San Simon ang ilang mga programa ug proyekto nga gipundohan karong tuiga.

Kini human ang Konseho sa Syudad atol sa sesyon niadtong Lunes nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa barangay diin nasukip ang ilang 2025 Annual Budget nga adunay gibana-banang kinitaan ug galastuhon balor P6,279,609.00.

Lakip sa gipundohan mao ang 20 porsyentong (20%) Development Fund balor P774,192.00; samtang P627,961.00 usab ang gigahin alang sa pagpatuman sa mga programa sa Sangguniang Kabataan; P313,980.00 alang sa Barangay Disaster Risk Reduction Management fund; P20 mil sa programa sa senior citizen; P150,000.00 alang sa rehabilitasyon sa ilang supply sa panubig; P150,000.00 ang gigahin alang sa ilang instalasyon sa street lighting system ug uban pang mga programa nga gilantaw’ng maghatag ug dugang kaarangan sa ilang serbisyo ngadto sa katawhan.

Ang 2025 annual budget sa Barangay San Simon miagi sa makuting pagtuon sa mga komite sa konseho ug nasuta nga nahiuyon sa balaod ug mahimo nang ipatuman sa labing dali nga panahon.

Ang resolusyon nga gipalabang sa konseho alang sa maong katuyuan gipaluyohan sa komite sa barangay affairs ni Konsehal Yan Lam Lim ug sa komite sa pamalaod ni Konsehal Edgar Cabanlas. (MLRapanot/SP)