Gihan-ay nga mga proyekto sa Brgy. Camaman-an ning tuiga mapatuman na

HAYAN mapatuman na sa Barangay Camaman-an ang ilang gihan-ay nga mga programa ug proyekto nga gipundohan karong tuiga.

Kini human ang Konseho sa Syudad atol sa sesyon niadtong Lunes nga gidumala ni Bise Mayor Bebot Rodriguez misagop sa resolusyon nga nag-uli sa ordinansa sa barangay diin nasukip ang ilang 2025 Annual Budget nga adunay gibanabanang kinitaan ug galastuhon balor P46,318,599.00.

Lakip sa gipundohan mao ang 20 porsyentong Development Fund balor P8,335,286.00; samtang P 4,500,000.00 ang gigahin alang sa pagtukod sa ilang Multi-Purpose Building ug Stage sa Sitio Tiera Del Puerto; P200,000.00 alang sa pagtrabaho sa dalan sa Sitio Palawan ug P200,000.00 ang gigahin sa rehabilitasyon sa ilang Satellite Health Center sa Sitio Berjaya relocation site sa nasangpit nga barangay.

Ang 2025 annual budget sa Barangay Camaman-an miagi sa makuting pagtuon sa mga komite sa konseho ug nasuta nga nahiuyon sa balaod ug mahimo nang ipatuman sa labing dali nga panahon.

Ang resolusyon nga gipalabang sa konseho alang sa maong katuyuan gipaluyohan sa komite sa barangay affairs ni Konsehal Yan Lam Lim ug sa komite sa pamalaod ni Konsehal Edgar Cabanlas.