Gaane motuki sa sugyot pagpanas sa Higala App Law

Padayong hisgutan sa komite sa panglawas ni Konsehal Malou Gaane sa tigom karong alas 9:30 sa buntag dinha sa hawanan sa konseho ang sugyot pagpanas sa Ordinance No. 14023-2021 kon ang ordinansa nga nagpatuman sa Higala Online Application (Higala App).

Kini nunot sa gidusong sugyot balaodnon nila ni Konsehal James K. Judith II, Roger Abaday ug Malvern Esparcia.

Namatikdan sa mga konsehal nga dili na haum sa kasamtangang panahon ang pagpatuman sa maong balaod gawas pa sa reklamo sa pipila ka mga molopyo nga nakahasol kini kanila ilabina sa ilang kabataang nagtungha.

Dugang tukion sa komite mao ang mga kalamboan sa pagpatuman sa Health Emergency Allowance kon One Covid Allowance.

Gipaabot motambong sa tigom sila si Konsehal Girlie Balaba, George Goking, Jay Pascual, Suzette Magtajas-Daba, Imee Moreno ug Yvy Emano.

Si Gaane nagdapit usab nila ni Dr. Jose Llacuna Jr. sa DoH, Dr. Efren Celeste sa City Health Insurance, City Health Officer Dr. Rachel Dilla, City Legal Officer Atty. Kenneth Tamala, City Administrator Atty. Roy Raagas, City DILg director Engr. Jane Docallos, Dr. Teodulfo Joselito Retuya Jr., Dr. Ferdinand Miranda, Dr. Michael June Perez, Zelfred Anthony Cocon, OCA chief Oliver Egypto, city budget officer Atty. Percy Salazar, city accountant Atty. Beda Joy Elot ug city treasurer Jasmin Maagad pagtambong sa tigom aron maghatag sa ilang panahom ug opinyon sa mga hisgutanang butang.