Fund raising nga kaugalingon ray makabenipisyo angay singlan sa buhis –Konsehal Goking

PANAHON na nga kolektahan sa buhis kadtong mga gapahigayon og fund raising nga ang ilang rang kaugalingon ang makabenipisyo.

Kini ang reaksyon ni Konsehal George Goking sa special report ni Konsehal Roger Abaday  sa sesyon sa konseho niadtong Lunes nga gidumala ni Presideing Officer Pro Tempore Konsehal Romeo Calizo mahitungod sa pagrepaso sa taas nga renta sa mga pwesto diha sa night café diha sa Rio de Oro Boulevard.

Sumala sa konsehal nga daghan kaayo mga tax evaders nga gakalusot  sa pagbayad sa buluhisan kay ipaagi nila sa fund raising, butang nga iyang gikadismaya.

Si Konsehal Goking mibutyag  nga kinahanglan nga mapasabot gayud sa usa  ka  grupo ngadto sa konseho  ang  katuyoan  ingon man ang paingnan sa ipahigayong kalihokan ayha sila ma-exempt sa pagbayad sa 20-porsyentong amusement tax kay kon dili, angayan silang pabayaron sa buluhisan sa syudad ingon man sa Bureau of Internal Revenues (BIR).

Segun usab sa kosehal nga milyones  ang gakawala sa panudlanan  sa   kagamhanan tungod kay adunay  pipila nga gapahigayon  sa kalihokan sama sa  alumni  homecoming ingon man sa basketball kay gawasnon sila  sa pagbayad sa  buhis.