Fuel subsidy dakong tabang sa mga PUV drivers – Goking

DAKO ang pasalamat ni Konsehal George S. Goking nga matubag na ang problema sa mga sektor sa transportasyon ug sa mga mag-uuma tungod kay ang Department of Budget and Management (DBM) mopagawas og pundo pinaagi sa DoTr aron magamit nga fuel subsidy ug suporta sa mga mag-uuma.

Kini ang nakitang solusyon sa nasudnong kagamhanan sa gipangayo ug hangyo sa drivers, operators ug mga mag-uuma kabahin sa hilabihan kataas ug sunod sunod nga pagsaka sa presyo sa produktong petrolyo.

Sa kasayuran nga nadawat ni Goking, adunay planong pagwelga sa mga pampublikong sakyan nga himuon ugmang adlawa, Marso 15, 2022.

Gikalipay ni Goking ang aksyon sa DBM kay mao man ang iyang gipaningkamotan nga mapugngan ang pagtaas sa presyo sa mga produkto ug matabangan ang mga konsumante kay dako kaayo ang epekto niini sa ekonomiya.

Mahinumdoman nga ang konsehal mihatag na sa iyang mga posibleng solusyon ug alternatibo aron maminusan ang konsumo sa gasolina.

Dako usab ang iyang kalipay nga masuportahan ang mga mag-uuma sa produksyon sa pagkaon aron ubay-ubay ang abot og mapakunhuran pa ang presyo sa mga lagutmon.

Walay problema nga dili masulbad kun ang tanan magtinabangay ug magsinabtanay, panapos ni Konsehal Goking.