Food market dihas Rio de Oro Boulevard abri sa tanang buot magdisplay - Pascual

“ANY one can apply but not everyone can afford.”

Kini ang pamahayag ni Konsehal Jay Roa Pascual, Chairman sa Komite sa Tourism, atol sa sesyon niadtong Lunes nga gidumala ni Bise Mayor Bebot Rodriguez, agig reaksyon sa taho ni Konsehal Romeo Calizo kabahin sa ipahimutang nga Higalaay Festival Market diha sa Rio de Oro Boulevard.

Matod sa konsehal nga gitugotan man ang tanan ug walay gipihig nga makadisplay basta kinahanglan lang gyud nga matuman ang mga sumbanan.

Gipasabot ni Pascual nga strikto kaayo sa pagpatuman niini mao nga mahal ang renta kay ang event organizer na mismo ang maghatag sa mga materyales ug uban pa nga gikinahanglan ngadto sa mga concessionaire sama sa generator alang elektrisad, tangke alang sa supply sa tubig, mga bag-ong tents, portable toilets lakip na security guards, sweepers aron sa pagseguro nga mamintenar ang kalimpyo ug kalinaw.

Samtang gidid-an usab ang pagdala sa pet ug ang pagbisikleta diha sa dapit nga pahimutangan sa food display.

Giseguro usab sa konsehal nga wala nagkulang ang mga organizers sa pagbayad sa mga taxes, permits ug uban pang rekisitos ubos sa Higalaay Festival alang sa umaabot nga kapistahan sa syudad.

Niini, dako ang paglaum ni Pascual nga unta makonsidera kining talagsaon nga matang sa food market gawas nga makadugang sa kalamboan sa tourism industry sa syudad, matabangan usab ang mga organizers mapasundayag ug maila ang ilang mga produkto ngadto sa tanan.