FICCO gipasalamatan ni Konsehal Daba

“EDUCATION is a known powerful and effective tool in breaking the cycle of poverty”.

Kini ang gibutyag ni Konsehal Suzette Magtajas-Daba, Chairman sa Komite sa Edukasyon, atol sa miaging MOA signing ceremony tali sa kagamhaman sa dakbayan sa Cagayan de Oro ug First Community Cooperative (FICCO).

Mahinumdoman nga ang konseho nipalabang sa Ordinance No. 14729-2024 nga naghatag panugot ni Mayor Klarex Uy pagpirma sa Memorandum of Agreement (MOA) tali sa kagamhanan ug FICCO kalabot sa ilang idonar nga  mobile training vehicle nga magamit sa mobile training program sa City College.

Si Konsehal Daba mipasalamat sa administrasyon ni Mayor Klarex Uy sa pagtutok sa mga programa sa edukasyon kay  siya nagtuo  nga  ang  kaugmaon sa dakbayan ug sa nasud anaa sa kamot sa kabatan-onan.

Samtang sa laing bahin, gipasalamatan sa konsehal ang FICCO sa pakigtambayayong sa mga programa sa kagamhanan sa natad sa edukasyon pinaagi sa pagdonar og wing van nga magamit gihapon alang sa mobile training program  nga dako  og ikatabang  sa pagbansay sa mga Kagay-anon ilabina diha sa lagyong dapit sa ingon  mapalambo ang ilang panginabuhian.