Face to face classes sa 16 ka mga tunghaan gilantaw

DUGANG mga tunghaan ang mahatagan og panugot nga manumbalik ang face to face classes dinhi sa syudad.

Kini human giuyonan sa Konseho sa Dakbayan sa Cagayan de Oro ang planong limited face to face classes sa mga tinun-an subay sa mga rekisitos nga gihan-ay sa buhatan sa mayor ug sa City Covid-19 Task Force.

Sa resolosyon nga gisagop sa konseho sa sesyon niadtong Lunes nga gidumala ni Bise Mayor Kikang Uy, girekomendar nga makapahigayon og limited face to face classes ang Suntingon Elementary School (Main Campus), Agusan National High School, Indahag Elementary School, CdO-National High School-Senior High Campus, East City Central School, City Central School, Consolacion Elementary School ug Angeles Sisters National High School.

Lakip sa girekomendar nga makapahigayon og limited face to face classes mao ang Bulua Central School, Bonbon National High School, Bongbongon Elementary School, Tuburan Elementary School, Taglimao National High School, Carmen National High School, Tignapoloan National High School ug Iba Integrated School sa barangay Dansolihon.

Si Konsehal Suzette Magtajas-Daba, chairman sa komite sa edukasyon ug nagpaluyo sa gipasakang resolosyon, mibutyag nga pabor siya sa hinay hinay nga pagpanumbalik sa face-to-face classes dala ang paglaum nga masunod sa hingpit ang health protocols nga gilatid sa IATF.

Dako ang pasalamat sa konsehal sa kagamhanan sa dakbayan ug sa Konseho sa pag-uyon sa maong lakang sa tinguha nga mas maangkon sa mga tinun-an ang gikinahanglang kahibalo ug kahanas kaysa magpabilin ang virtual platform ug modules nga pamaagi.