F2F classes sa 4 ka tunghaan sa CDO gilantaw

UYON ang Konseho sa dakbayan sa Cagayan de Oro nga manumbalik na ang face to face (F2F) classes sa mga piniling tunghaan dinhi sa syudad.

Sa resolosyon nga gipasaka sa Konseho sa sesyon niadtong Lunes nga gidumala ni Bise Mayor Kikang Uy, girekomendar ang planong face to face classes sa mga tinun-an subay sa mga rekisitos ug giya nga gihan-ay sa buhatan sa mayor o’ sa City Covid-19 Task Force.

Lakip sa girekomendar nga makapahigayon og face to face classes mao ang Grade 12 Technical Vocational classes sa East Gusa National High School alang sa Electrical Installation Maintenance (EIM) course, klase sa automotive sa Lapasan National High School ug Shielded Metal Arc Welding (SMAW) Bulua National High School.

Girekomendar usab ang limited face to face classes diha sa Kauswagan National High School sa Barangay Kauswagan.

Si Konsehal Suzette Magtajas-Daba, nagpaluyo sa gipasakang resolosyon, mibutyag nga pabor si Mayor Oscar Moreno sa hinay hinay nga pagpanumbalik sa face to face classes sa kondisyon nga masunod sa hingpit ang health protocols nga gilatid sa IATF ug mamintinar nga adunay insaktong bentilasyon ang mga lawak saringan aron maminusan ang pagkaylap sa Covid.

Dako ang akong pasalamat sa kagamhanan sa dakbayan ug sa Konseho sa paghatag og pag-uyon sa maong lakang sa tinguha nga maangkon sa mga tinun-an ang gikinahanglang kahibalo ug kahanas nga dili maangkon kun magpabiling virtual ang platform sa pagtudlo, pamahayag ni Konsehal Suzette Magtajas-Daba.