Ethics committee padayong magdungog sa mga reklamo batok opisyal sa brgy

Magpadayon ang pagdungog sa Komite sa Ethics and Blue Ribbon ni Konsehal Edgar Cabanlas sa gipasakang reklamo batok sa pipila ka mga opisyal sa barangay sa dakbayan.

Sa gitakdang tigom sa Hulyo 6, 2023, tukion ang reklamo batok sa kapitan sa barangay Puntod alang sa kasong simple misconduct ug oppression; reklamo batok kapitan sa Barangay 36 alang sa kasong grave misconduct, ug reklamo batok sa kapitan sa Barangay 32 human matod pa gipa-arkelahan ang bahin sa lunang gipanag-iyahan sa pribadong indibidwal nga walay panugot gikan sa mga sumusunod.

Tukion usab sa tigom ang reklamo batok sa kapitan sa Barangay FS Catanico alang sa kasong Grave Abuse of Authority, Grave Misconduct, Dishonesty ug Conduct Prejudicial to the Best Interest of the Service ug kaso batok sa kapitan sa Barangay 31 human matod pa migahin og pundo alang sa mga kalihokan nga giingong wala gipahigayon.

Ang tigom sa komite gipaabot tambongan nila ni Konsehal Jose Pepe Abbu Jr., Girlie Balaba, Romeo Calizo, Roger Abaday, James Judith II ug Bise Mayor Bebot Rodriguez. Si Cabanlas nagdapit usab sa mga nanumbong ug sinumbong pagtambong sa gitakdang tigom sa alas 2 sa hapon sa Hulyo 6, 2023 dinha sa hawanan sa konseho.