Estudyante, sikad drivers nakadawat og ayuda gikan sa PCL

DAGHANG katawhan  diha sa Barangay Carmen ning dakbayan ang nakapahimulos sa  serbisyo nga gitanyag sa nasyonal nga buhatan sa Philippine Councilors League (PCL) pinaagi sa gipahigayong Outreach Program di palang dugay.

Kini tungod sa pagpaningkamot sa liga pinaagi sa Cagayan de Oro PCL President ug Misamis Oriental Regional Chairman Konsehal George Goking.

Nasayran nga mokabat sa 150 ka estudyante ang nahatagan og school supplies, 200 ka drivers sa trisikad ang nakadawat og bugas samtang 450 ka indibidwal ang nahatagan sa pagkaon (Jollibee) gikan sa liga.

Si Konsehal Goking mipasabot nga magpadayon ang programa sa PCL nga maningkamot makatabang sa katawhang kabus sa kadaplinan samtang iyang gipasalamatan ang  tanang sakop sa liga sa ilang hiniusang panglantaw nga makatabang  sa lain laing sektor sa  katilingban.