Esparcia uyon sa lakang nga mapadali paglukat og bldg permit

Pabor si Konsehal Bernie Esparcia sa paningkamot sa komite sa public works and highways nga mapadali ang proseso dinha sa paglukat og building permit.

Sa milabayng tigom sa komite nga gidumala ni Konsehal John Michael Seno, si Eparcia misugyot nga unta ang mga kawani sa buhatan sa Building Official (OBO) nga moatobang sa mga kliyente kadto untang managsama ang ilang linguwahi aron dali nga magkasinabot ug dali masabtan ang gusto ipaabot sa maong higayon dili na magbalik balik ang kliyente.

Gani, matod niya nga mao usab kini ang komento sa ubang mga engineers nga iyang nahinabi nga langan kaayo ang proseso sa OBO dinhi sa syudad kun itandi sa ubang lugar nga unta susamang National Building Code man ang gisunod.

Niini, si Engr. Joel Momongan, officer in charge sa OBO, mibutyag nga ila na kining gihatagan sa pagtagad ug gani aduna nay gipatumang kausaban ang ilang buhatan diha sa pagdawat sa mga aplikayon.