Esparcia suportado mga lakang pagsolbad sa pagbaha sa Bugo

PADAYON   ang  komite sa climate change ni Konsehal Bernie Esparcia  pagsuporta sa mga  lakang  sa Barangay Bugo tumong sa pagsolbad sa problema sa pagbaha.

Kini human  gituki sa  komite  sa milabyang  tigom ang   especial report sa konsehal  mahitungod sa  problema sa  pagbaha sa barangay Bugo panahon nga mobunok ang kusog nga ulan  nga nakahatag og pelegro sa katawhan ug mga kabtangan.

Matod ni Esparcia nga nakauban ug nakasaksi gayod siya sa gipahigayong inspection sa dapit ug iyang nakita nga napuno  ang mga kanal sa lapok, ug ang uban ning-awas na sa kanal.

Sa iyang bahin, ang representante sa Bugo Environmental Advocates  mibutyag nga lakip sa  ilang gitumbok nga mga hinungdan sa daling pagbaha sa ilang barangay  ang kabaga sa lapok sa mga kanal,  wala matibawas  nga mga  dalan, illegal quarry  ug uban pa  nga nagkinahanglan sa igong  pagtagad.

Si Esparcia  mibutyag nga magpadayon ang  iyang komite sa pagsuporta  sa mga lakang nga himoon sa barangay  alang sa kasulbaran  sa problema sa pagbaha sa maong dapit. (JRGalano/SP)