Esparcia pabor sa pagtukod og welcome arches sa CDO

Pabor si Konsehal Bernie Esparcia, chairman sa komite sa climate change, nga butangan og welcome arches ang mga utlanan sa Cagayan de Oro aron masayran sa mga motorista o’ sa katawhan nga anaa na sila sulod sa teritoryo sa Cagayan de Oro.

Kini ang reaksyon sa konsehal sa special report ni Konsehal James Judith II, atol sa sesyon niadtong Lunes nga gidumala ni Bise Mayor Jocelyn Rodriguez, nga matukuran og welcome arches o boundary markers ang mga utlanan sa dakbayan.

Gipasabot ni Esparcia nga nasayod siya nga dako ang gikinahanglang pagtuki dinha sa pagtumbok sa mga doluna sa dakbayan tali sa kasikbit nga mga munisipyo apan ang gusto man lang sa taho nga masayran sa mga dumuduong nga pasulod na sila sa syudad.

Ang punto niini nga pagsulod sa syudad adunay makita ang mga turista nga nag-abi abi kanila o’ timalihan nga nakasulod na sila sa dakbayan, pamahayag ni Konsehal Esparcia.