Esparcia pabor mapadali ordinansa paghatag multa sa nagpasagad sa iro

SI Konsehal Bernie Esparcia, chairman sa komite sa climate change adaptation & mitigation and disaster risk reduction, mipadayag sa iyang pag-supporta nga mapadali ang gihan-ay nga ordinansa alang sa tukmang multa niadtong mga nanag-iya sa iro nga gipasagdan og naglatagaw nalang sa kadalanan diin peligro nga makapaak sa katawhan.

Kini ang gipaambit nga opinyon ni Konsehal Esparcia atol sa sesyon niadtong Lunes nga gidumala ni Bise Mayor Bebot Rodriguez diin gikompirma sa Konseho sa Syudad sa katudloan ni Dra. Helen Tacondong isip bag-ong hepe sa City Veteninary Office.

Sumala ni Esparcia nga dakong posibilidad nga maminusan ang mga naglatagaw nga iro kung mapahamtangan sa tukmang multa ang mga tag-iya pinaagi sa pagpatuman sa maong balaod kay mataha naman kini sa pagpasagad sa ilang mga binuhi, gani pamaagi usab kini nga ma-disiplina ang katawhan, sumpay sa konsehal.

Siya mibutyag nga bisan sa paningkamot sa City Veterinary Office, apan dili magahom sa maong buhatan ang regular nga pagpahigayon sa Oplan Pamatong sa 80 ka barangay matag adlaw.

Niini malaumon ang konsehal nga mapadali ang maong ordinansa aron hingpit kining mapatuman sa dakbayan ug malikayan ang nagtaas nga kaso sa mga napaakan sa iro. (MLRapanot/SP)