Esparcia naninguha magiyahan mga tinun-an sa aplikasyon sa educ’l aid

GITINGUHA ni Konsehal Bernie Esparcia nga magiyahan ang mga tinun-an nga mi-apply sa Financial Educational Assistance sa Department of Social Welfare and Development (DSWD).

Sa sesyon sa konseho niadtong Lunes nga gidumala ni Bise Mayor Jocelyn Rodriguez, gidapit ang kadagkoan sa ahensya aron pag-update sa konseho sa tukmang kahimtang sa pagpatuman sa programa dinhi sa dakbayan.

Sa maong higayon gipangutana sa konsehal kun mahimo bang ma-monitor sa mga tinun-an ang ilang aplikasyon o’ adunay bay tracking number nga ihatag aron masunod kini labina nga dili tanang nag-apply ang mahimong makadawat.

Gani, nalipay ang konsehal nga online ang pag-apply kay malikayan ang paglinya apan gusto niya nga dili usab magdahum ang usa ka aplikante ilabina kun ugaling dili kini eligible sa programa aron aduna pa silay panahon nga makapangita sa lain nga paagi.

Hinoon, gibutyag sa taga-DSWD nga sa ilang pag-apply adunay mogawas nga kompirmasyon nga nasulod ang aplikasyon sa ilang data base apan ang mahatagan kadtong lang mga aplikante nga nakitang eligible human sa ipahigayong pagsuta nga walay duplikasyon sama na lang kun iskolar sa CHED, LGU o’ uban pang ahensya sa gobyerno.

Niini, malaumon si Konsehal Esparcia nga ma-update gayud sa ahensya ang mga aplikante sa estado sa ilang mga aplikasyon matag karon ug unya.