Esparcia naninguha maabagan mga sumasakay sa bao-bao

“Unta mahatagan sa alternatibong kasakyan ang mga sumasakay sa dakbayan sa Cagayan de Oro.”

Mao kini ang panawagan ni Konsehal Bernie Esparcia atol sa sesyon sa konseho niadtong Lunes nga gidumala ni Bise Mayor Bebot Rodriguez, human iyang nadungog ang pamahayag sa kadagkoan sa Roads and Traffic Administration (RTA) nga gidili ang pag-agi sa mga bao bao dinha sa highway.

Matod niya nga gibasehan sa RTA ang memorandum nga giluwatan sa DILG ug LTO nga nagdili sa mga bao bao dinha sa highway tungod kay walay kapaseguroan ang pagdagan niini kuyog sa mga dagkong salakyan.

Sa iyang special report, ang konsehal mibutyag sa iyang namatikdan nga matag alas 7 sa gabii mogarahe na ang mga pampumblikong sakyanan ug wala nay jeep nga gadagan. Niini, ang mga bao bao maoy magpasakay sa katawhan nga nagtrabaho ug mouli sa gabii ilabina nga nakitang mas segurado panahon sa ulan ulan itandi sa mga motorsiklo.

Gawas pa, kun itandi sa taxi mas barato usab ang singil sa mga driver sa bao bao, dugang ni Esparcia. Siya nanawagan nga unta matutukan na ang isyu sa operasyon sa mga bao bao tungod kay buot usab natong matunol ang saktong serbisyo ug transportasyon ngadto sa nanginahanglang katawhan.

Ang panawagan ni Esparcia giduso ni Bise Mayor Rodriguez ngadto sa Komite sa Public Utilities (Roads and Traffic Management) ni Konsehal Romeo Calizo alang sa makuting pagtuon ug rekomendasyon.