Esparcia nangusog mapuslan tanang panimalay’ng natukod sa 722 Housing

“SAYANG kaayo ang pipila ka housing units dinha sa 722 Housing Project sa Sitio Pahiron, Lumbia nga gidonar sa Japanese Government nga hangtod sa kasamtangan walay mga nag-okupar.”

Mao kini ang gipadayag ni Konsehal Bernie Esparcia, sa sesyon sa Konseho niadtong Lunes nga gidumala ni Bise Mayor Bebot Rodriguez, human personal nga iyang nabisita ang dapit. Matod niya nga patsada kaayo ang mga units kun itandi sa ubang housing units tungod kay single detach kini apan pipila ka mga units walay nag-okupar.

“Nangaguba na tungod sa landslide, napuno sa sagbot ug mga bandalismo gawas pa nga nangawala na ang ubang parte,” dugang sa konsehal.

Niini, iyang gipangutana kun ang buhatan sa City Housing and Urban Development Department (CHUDD) kanunay nga nagmonitor sa mga housing projects ug kun gipasagdan na sa mga awardee, aduna bay proseso nga mapanas ang award gikan sa mga benepisaryo aron mahatag sa mas nanginahanglan.

“Kasagarang rason nga dili okupahan sa benepisaryo ang ma-award nga housing unit mao ang gilay-on niini sa ilang kapanginabuhian ug sa kasamtangang gipuy-an. Lehitimo kini nga rason, apan sayang ang natukod nang mga panimalay nga alang unta kanila,” pamahayag ni Esparcia.

Dili tanang 722 housing units natukod sa Pahiron

Dili ang kinatibuk-ang 722 housing units ang natukod dinha sa Pahiron, Lumbia kun dili 511 ka units lang. Mao kini ang gipasabot ni Konsehal Edgar Cabanlas, Chairman sa Komite sa Urban and Rural Poor and Housing Development, sa maong taho ni Esparcia. Iyang gipasabot nga 186 ka mga units gikan sa 722 natukod dinha sa Macapaya, Camaman-an samtang 25 ka unit ang anaa sa Gawad Kalinga sa Barangay Balubal.

“Aduna lay 211 ka mga units ang kasamtangang naokupahan tungod kay dili maigo ang 722 ka units sa dapit hinungdan nga gibahin kini sa ubang relocation area,” dugang sa konsehal.

Matod niya nga daghang mga isyu ang ilang gakadawat mahitungod sa pag-apod-apod sa mga balay dinha sa Pahiron. Gani, adunay giingong dili tinuod nga mga benepisaryo ang nakapahimulos sa programa hinungdan nga iyang gisugyot ang pagpa-imbestigar nga nakalangan sa hingpit nga pagpatuman sa programa.

Nakadugang usab ang pagbiya sa kontraktor sa proyekto diin kapin sa 100 pa ka housing units ang wala matibawas ug wala matunol pabor sa mga benepisaryo. Dako ang iyang panghinaut nga kun masusi ang mga giingong taho mahatagan sa katin-awan ang tanan ug matunol ngadto sa angayan ug kwalipikadong mga benepisaryo ang mga housing units.