Esparcia nangusog mapalapdan programa sa gender sensitivity

ANGAYANG mapalapdan pa ang programa sa gender sensitivity diha sa matag barangay.

Mao kini ang hugot nga gisugyot ni Konsehal Bernie Esparcia atol sa milabayng tigom sa komite sa Sports and Youth Development ni Konsehal John Michael Seno human gituki ang gisumeteng annual budget sa Sangguniang Kabataan sa barangay Camaman-an.

Gipasabot ni Esparcia nga pipila sa mga kabataan nga maglisod og pagpadayag sa ilang kaugalingon sa rason nga anaa sa taas nga hut-ong ang pamilya.

Ang uban, matod pa, dili at home sa kaugalingong pinuy-anan kay dili madawat sa pamilya ang ilang napiling kinatawhan. Gani, adunay magrebelde kay dili mabati ang ilang presensya sa ilang mga panimalay hinungdan nga dili ganahan magpuyo sa ilang mga pinuy-anan.

Siya midugang nga isip mga ginikanan maklaro kun unsay kinaiya sa matag myembro diha sulod sa panimalay ug gikinahanglan magsumikad ang pagdawat diha sa pamilya.

Niini, hugot nga gihangyo ni Konsehal Esparcia nga palapdan ang programa sa gender sensitivity pinaagi sa pag-edukar sa mga ginikanan aron matabangan sa pagdawat sa unsa mang sexual orientation ang usa ka bata.

Alayon niini, si Seno mipadayag sa iyang suporta sa sugyot ug malaumon nga mapatuman kini sa matag barangay. (SP/RNQuiblat)