Esparcia nakisayod sa proseso pagdawat og pasyente sa City Hospital

NAKISAYOD si Konsehal Bernie Esparcia atol sa tigom sa komite sa panglawas nga gidumala ni Konsehal Malou Gaane sa pamaagi sa J.R. Borja General Hospital sa proseso diha sa ilang pagdawat og pasyente.

Kini human ang komite mituki sa sugyot ordinansa nga mag-amendar sa Article 888, Section 225 sa Ordinance No. 12860-2014 kon “Schedule of Fees and Charges” nga gipahamtang sa paggamit sa fasilidad ug serbisyo nga gitanyag sa ospital.

Gipasabot ni Esparcia nga iyang giklaro kun modangop sa maong ospital unsaon nila pag-determinar ang klasifikasyon sa mga pasyente tungod kay adunay mga pasyente nga bulingit tan-awn apan sapian diay ug aduna usay datu og postura apan diay pobre.

Niini, ang representante sa ospital mibutyag nga unang gapangyoon aron ma-admit mao ang Philhealth ID.

Hinuon, si Gaane mipasabot nga tungod kay ang JRBGH usa man ka pampublikong ospital walay bayaran ang pasyente nga ma-admit kay ang funding institution sama sa Philhealth mao man ang magbayad niini.

Dako ang pasalamat ni Esparcia sa kadagkoan sa ospital sa ilang pagpasabot ug padayong pagserbisyo sa mga nanginahanglan sa serbisyo medical.