Esparcia nakisayod sa kaarangan sa enforcers, traffic lights

KUMUSTA ang paglevel-up sa mga enforcers ug pagpatuman sa kaarangan sa traffic lights sa syudad?

Kini ang pipila sa mga pangutana ug buot masayran ni Konsehal Bernie Esparcia, apas sumpay sa iyang special report kalabot sa kakulangon sa pagpatuman sa mga balaod sa trapiko, atol sa sesyon sa konseho niadtong Lunes nga gidumala ni Bise Mayor Bebot Rodriguez.

Sa maong higayon, siya nakisayod kun pila ang  kasamtangang ratio tali  sa motorista ug traffic enforcers diha sa kadalanan ug kun pila ang ideal nga ratio niini.

Gani, iyang gibutyag nga sa dihang nag post siya sa social media adunay nagpaabot og komento nga daw gakapuyan og trabaho ang mga traffic enforcers tungod sa kainit sa trabaho  ug labaw sa tanan gakalangan pa ang ilang suhulan.

Dugang niini, ang konsehal nakisayod  sa kahimtang sa  traffic lights sa syudad diin gitandi sa ubang highly urbanized city nga ang CCTV  sa mga traffic lights mahimong makadakop sa hulagway sa mga violators hinungdan nga dali ra kini  masikop.

Ang special report ni Esparcia giduso ni Bise Mayor Rodriguez ngadto sa Komite sa Public Utilities ni Konsehal Romeo Calizo.