Esparcia nahingawa sa kahimtang sa sapa Bantiles, Gemelina

DAKO ang kahingawa ni Konsehal Bernie Esparcia sa iyang nakita nga kahimtang sa mga sapa sa Sitio Bantiles ug Gemelina sa Barangay Bugo.

Kini human gipahigayon sa milabayng semana sa Komite sa Public Works ni Konsehal John Michael Seno ang pagsusi didto sa maong mga sapa sa tinguha nga makita ang tukmang kahimtang ug mapangitaan sa solusyon ang gakasinating pagbaha sa ubos nga bahin sa Bugo.

Mahinumduman nga si Esparcia ang mitaho ngadto sa konseho kabahin sa nasinating grabeng pagbaha sa Bugo sa milabayng mga bulan.

Sa maong higayon, nakita ni Esparcia nga ang mga sapa napuno na sa mga balas ug bato ug aduna pay bahin nga nahubsan o’ namalhan na sa tubig nga gihimo nang basketball court o’ dalan.

Niini, malaumon si Esparcia nga pinaagi sa Komite sa Public Works ug mga hintungdang ahensya sa gobyerno masolosyonan ang problema sa maong barangay aron dili na maperhuwisyo ang katawhan.