Esparcia nahingawa sa kahimtang sa mga traffic light

MALAUMON si Konsehal Malvern Esparcia, Chairman sa Komite sa Climate Change Adaptation and Mitigation and Disaster Risk Reduction, nga nagahinan sa pundo sa Roads and Traffic Administration ang mga traffic light sa syudad human gipatas-an ang budget niini sa sunod tuig 2025.

Kini ang gipaambit nga panahom ni Konsehal Esparcia atol sa budget hearing sa konseho uban sa mga Departamento sa local nga kagamhanan sa syudad alang sa tuig 2025.

Sumala sa konsehal nga adunay pipila ka traffic light nga wala na migana ug angayan kining pagasutaon aron matagaan sa pagtagad kay dako kinig ikatabang sa pagpahapsay sa dagan sa trapiko sa Dakbayan.

Gibutyag sa kadagkoan sa Roads and Traffic Administration nga lakip sa gipundohan sa ilang buhatan mao ang pag-pintura sa mga pedestrian lane ug uban pang mga programa nga gilantaw’ng maghatag kaarangan sa operasyon sa ilang buhatan.

Niini malaumon si Esparcia nga pinaagi sa paghatag og dugang pundo sa RTA makatabang kini alang sa pagpalapad sa ilang operasyon. (File Photo)