Esparcia motuon sa sugyot pagtukod og animal rescue shelter

PADAYONG tun-an sa Komite sa Climate Change Adaptation and Mitigation and Disaster Risk Reduction ni Konsehal Bernie Esparcia ang sugyot ordinansa nga giduso ni Bise Mayor Bebot Rodriguez nga maghatag og kapasegurohan sa mga hayop panahon sa katalagman.

Kini human si Dra. Perla Asis, hepe sa buhatan sa City Veterinary (CVO), sa milabayng tigom sa komite, misugyot nga aduna untay balaod ang kagamhanan aron naay basihan nga makamugna og kaugalingong Animal Rescue Shelter ang syudad.

Gisegurado usab ni Asis nga nagamit sa saktong programa ang pundong P2 milyones nga tabang pinansyal sa buhatan sa Cagayan de Oro Risk Reduction and Management Department (CDRRMD).

“Wala nagkulang sa pag-atiman sa tanang matang sa mga mananap, nasikop man o’ naluwas, pinasikad sa RA 9482 kun Anti-Rabies Act 2007 ang buhatan,” pamahayag ni Asis.

Siya midugang nga dili tanan nga anaa sa impound cages magresulta og euthanasia kay daghan pud mopaingon sa pagsagop uban sa tabang sa Non-Government Organization (NGO) nga CDO Animal Welfare Society Inc.

Niini, gitahasan ni Esparcia ang buhatan sa City Vet pagtuon ug paghatag sa rekomendasyon alang sa gikinahanglang pag-amendar sa Ordinance No. 9852-2005 kon Animal Control and Welfare Ordinance sa tinguha nga makamugna sa gikinahanglang Animal Rescue Shelter ang syudad.