Esparcia misuporta sa sugyot pagsuspende sa implementasyon sa Higala App QR Code

PABOR si Konsehal Bernie Esparcia sa sugyot nga isuspende ang pagpatuman sa Higala App QR Code dinhi sa dakbayan.

Kini ang reaksyon sa konsehal sa special report ni Konsehal Roger Abaday atol sa sesyon sa konseho niadtong Lunes nga gidumala ni Bise Mayor Bebot Rodriguez, kalabot sa giingong pagpatuman sa duha ka tunghaan sa syudad sa maong QR Code nga matod pa nakahasol sa mga tinun-an ug mga ginikanan.

Gipasabot ni Esparcia nga bisan sa iyang personal nga kasinatian iyang namatikdan nga dili na strikto ang pagpatuman sa QR Code sa mga malls sa syudad.

Gani, nag-abli naman ang mga establisamento sama sa mga bars in full operation ug wala siya sukad nakadawat og reklamo ug text nga adunay nagpositibo sa Covid-19 nga customer, dugang sa konsehal.

Mahimong dili na seguro ipatuman ang ordinansa o’ panason na kini aron dili na mahasol ang katawhan sa dakbayan, pamahayag ni Konsehal Bernie Esparcia.