Esparcia misuporta sa panawagan sa responsableng pagbalita

Suportado ni Konsehal Bernie Esparcia ang panawagan ni Konsehal Ian Achas alang sa responsableng pagtaho sa mga kaso sa suicide dinhi sa syudad.

Sa sesyon sa konseho niadtong Lunes nga nga gidumala ni Bise Mayor Bebot Rodriguez, gibutyag sa konsehal nga nalipay siya tungod kay iya kining nalakbitan sa miaging sesyon ang reponsableng pagbalita sa mga panghitabo dili lang sa mga paghikog kun dili lakip na sa mga insidente sa disgrasya sa kadalanan.

Gani, gipasabot ni Esparcia nga ang tanang media outlet nga sakop sa Kapisanan ng mga Broadcaster sa Pilipinas (KBP) nasayod sa mga angayan sundon kun unsaon ang responsableng pagbalita sa usa ka insidente.

Iyang gipasabot nga usa sa angayan hatagan sa pagtagad ang social media tungod kay daghan sa mga FB users ang ganahan og kuha og video o’ hulagway sa panahon nga adunay makitang disgrasya gawas nga maglumba pa kinsa’y makauna pagpakaylap sa balita sa social media.

Maayo kayo ang sugyot nga balaodnon, ang problema lang ang social media kay mao ni problema kun unsaon pag-screen ang mga ipakaylap sa social media, pamahayag ni Konsehal Esparcia.