Esparcia, misuporta sa pagtamod sa Berlin Urban Nature Pact

Kusganong gisuportahan ni Konsehal Bernie Esparcia, chairman sa Komite sa Climate Change, ang pagtamod sa kagamhanan sa dakbayan sa Berlin Urban Nature Pact.

Kini human gipresentar ni Konsehal Ian Mark Nacaya, sa session sa Konseho niadtong Lunes nga gidumala ni Bise Mayor Bebot Rodriguez, ang angayang mga lakang nga makatabang ang dakbayan pagproteher sa kinaiyahan.

Matod ni Esparcia nga nalipay siya sa maong kasabutan tungod kay nakalinya kini sa Local Climate Change Action Plan sa syudad ug na-atol usab nga mao kini ang gitutukan sa komite, ang problema sa climate change nga nagkinahanglan sa igong pagtagad. Iyang gipasabot nga sa iyang pagsubay, nalipay siya tungod kay adunay mga programa nga nagtutok sa pagtubag sa problema sa Climate Change nga dako kaayo og ikatabang sa pagpanday sa Local Climate Action Plan sa syudad.

Subay niini, gisugyot ni Esparcia nga makapalabang og ordinansa alang sa maong katuyuan aron mapatuman sa hingpit dinhi sa syudad ang mga probisyon nga nalatid sa nahisgotang kasabutan.