Esparcia misuporta sa pagpatuman sa Solidwaste Mgmt Plan

Hugot nga gisuportahan ni Konsehal Bernie Esparcia ang hingpit nga pagpatuman sa Solidwaste Waste Management Plan sa syudad. Kini ang reaksyon sa konsehal, sa sesyon sa Konseho niadtong Lunes nga gidumala ni Presiding Officer Protempore Konsehal Romeo Calizo, sa special report ni Konsehal Roger Abaday kalabot sa pagpatuman sa Solid Waste Management Plan sa dakbayan.

“Nahibalo ako nga dugay na kini nga problema lakip na ang kakulangon sa pag-segregate sa mga basura ug dugay na usab ang ordinansa alang sa maong katuyuan apan kulang kini sa pagpatuman hinungdan nga hangtod sa kasamtangan nagpabilin nga walay kasulbaran,” pamahayag sa konsehal.

Niini, iyang gilakbitan nga isip magbabalaod, namatikdan gayud nga daghan nang ordinansa ang napalabang sa Konseho apan kulang sa ngipon, butang nga iyang gikadismaya.

Alayon niini, si Esparcia mihangyo ni Abaday nga madapit sa ipahigayong panagtigom sa Komite sa Environment, Health ug Barangay Affairs ang Komite sa Climate Change tungod kay andam siya nga motabang sa pagsulbad sa maong kakulangon.

Gani iyang gisugyot nga mapatawag gayud ang tanang barangay ingon man ang mga basurero aron malingkoran kini nga butang.