Esparcia misuporta sa lakang pagsumpo sa mga pagpameke sa business permits

GIKAHINGAWA ni Konsehal Bernie Esparcia, chairman sa komite sa climate change, ang taho nga adunay mga tao nga gapameke og business permit certificates sa kagamhanan sa dakbayan.

Sa milabayng tigom sa komite sa trade and commerce ni Konsehal George Goking, mismo ang taga-treasurer’s office ang mikompirma nga sa nangaging katuigan aduna silay nasapon nga nagbuhat niining hiwing kalihukan. Matod ni Esparcia panahon na nga ipalambo pa ang business permit certificate nga kanang dili dali masundog sa pipila ka mga mapahimuslanon.

Gani, iyang gisugyot nga hatagan og gahom ang mga ordinaryong katawhan nga motaho kun adunay mabantayan nga mga katahapang business permit certificates aron kini mahunong. Gisugyot usab ang pagmugna og hotline nga maoy daling matawagan aron pagtino sa mga taho sa mga nagpakabanang lungsoranon.