Esparcia misugyot striktong ipatuman ang balaod sa trapiko

GISUGYOT ni Konsehal Bernie Esparcia, chairman sa Komite sa Climate Change Adaptation and Mitigation and Disaster Risk Reduction, ang estriktong pagpatuman sa balaod sa trapiko aron tumanon sa katawhan ang gabayan nga gisita sa balaod.

Kini ang pamahayag ni Konsehal Esparcia agig reaksyon sa special report ni Konsehal Yvy Emano sa sesyon niadtong Lunes nga gidumala ni Bise Mayor Bebot Rodriguez mahitungod sa kapasigurohan sa katawhan nga moagi sa mga pedestrian lane ug overpass sa syudad.

Sumala sa konsehal nga angayan tan-awon ang desinyo sa pipila ka overpass aron mapuslan sa katawhan sa  pag-agi sama sa overpass diha sa Centrio diin adunay island taliwala sa dalan hinungdan nga mapugos ang mga tawo sa paggamit  sa maong overpass, sumpay ni Esparcia.

Siya midugang nga angayan ipatuman sa hingpit ang maong ordinansa aron malikayan ang mga aksidente sa kadalanan.

Nunot niini, kusganong gisuportahan ni Konsehal Esparcia ang maong taho ni Emano ug malaumon nga kini mahatagan sa pagtagad sa mga hingtungdan buhatan.

Ang maong special report giduso ni Bise Mayor Bebot Rodriguez ngadto sa Komite sa Public Utilities ni Konsehal Romeo Calizo ug Komite sa Public Works ni Konsehal Edgar Cabanlas alang sa tukmang aksyon ug rekomendasyon.