Esparcia misugyot pagmugna sa Quick Response Team sa problema sa trapiko

Gisugyot ni Konsehal Bernie Esparcia, chairman sa Komite sa Climate Change, atol sa sesyon sa Konseho niadtong Lunes nga gidumala ni Bise Mayor Bebot Rodriguez ang pagmugna og Quick Response Team nga moresponde sa mga problema sa trapiko sa kadalanan. Kini ang reaksyon sa konsehal sa special report ni Konsehal John Michael Seno kabahin sa nasinating kahuot nga dagan sa trapiko diha sa Puerto National Highway.

Gipasabot ni Esparcia nga miabot sa pila ka oras ang kapiot sa dagan trapiko diin daghan kaayo ang naapektohan tungod sa gitrabahong proyekto sa Puerto Highway nga walay igong pagpahibalo. Matod niya nga kinahanglan nga seryosohon ug hatagan sa igong pagtagad ang problema aron dili na mausab tungod kay dili tiaw nga matanggong sa dalan sulod sa pila ka oras nga wala mapangandami.

Niini, siya nanghinaot nga unta mamugna ang Quick Response Team nga moresponde gilayon sa susamang mga insidente nga modumala sa trapiko aron maminus minusan ang paghuot sa kadalanan.