Esparcia misugyot matumbok ang Buntod Cave isip tourist destination

GIKLARO ni Konsehal Malvern Esparcia, chairman sa Komite sa Climate Change Adaptation and Mitigation and Disaster Risk Reduction, ngadto sa mga kawani sa Department of Environment and Natural Resources (DENR) kon mahimo bang ma-classify ang Buntod Cave diha sa Barangay Dansolihon ug ang kasamtangan mga langub sa syudad isip tourism destination.

Kini ang gipadangat nga panahum ni Konsehal Esparcia atol sa sesyon niadtong Lunes nga gidumala ni Bise Mayor Bebot Rodriguez.

Sumala ni Esparcia nga mahimong makabenipisyo sa kinitaan ang syudad ug makatabang sa pagpangempliyo sa katawhan kun ang maong langub mahimong tourist destination sa dakbayan.

Hisayran nga giduso sa Department of Environment and Natural Resources ngadto sa konseho sa syudad ang ilang program proposal sa tuyo nga ma-preserba ang mga langub sa dakbayan.

Niini malaumon si Konsehal Esparcia nga pabiling  mapanalipdan ang kinaiyahan sa mga hingtungdan ahensya sa goberno aron malikay sa trahedya ug katalagman.