Esparcia misugyot matugotan mga katawhan pagdala og pets dihas Rio de Oro boulevard

SI Konsehal Malvern Esparcia, Chairman sa Komite sa Climate Change, misugyot sa pagpalabang og ordinansa nga magpanday sa giya ug palisiya nga magtugot sa katawhang modalikyat sa Rio de Oro Boulevard nga madala ang ilang mga pets o’ binuhing hayop.

Sa sesyon sa Konseho niadtong Lunes nga gidumala ni Bise Mayor Bebot Rodriguez, iyang gipasabot nga unta makonsiderar sa Technical Working Group (TWG) ang kasamtangang palisiya nga nagdili sa mga pet owners pagdala sa ilang mga binuhing hayop diha sa maong boulevard.

Gani, namatikdan nga daghan pa ang mga iro nga galatagaw nga wala usab maatiman sa hintungdang ahensya.

“Ang gikinahanglang aron madala ang mga binuhing hayop dinha sa Rio de Oro Boulevard mao nga halapad nga information drive sa mga sumbanan sa pagdala o pagsuroy sa mga binuhing hayop,” dugang ni Esparcia.

Sa iyang bahin, si Bise Mayor Bebot Rodriguez mipadayag sa iyang pagsupak sa palisiya nga nagdili sa pagdala sa mga binuhing hayop tungod kay matod niya kining mga pets kabahin na sa pamilya.

Ang konsehal mipasabot nga gikinahanglan lamang nga atimanon sa mga nanag-iya ug hatagan sa dagkong multa sa higayon nga kini makalapas sa nahan-ay nga giya.

Ang sugyot ni Esparcia giduso ngadto sa TWG alang sa dugang pagtuon ug rekomendasyon.