Esparcia misugyot mapatuman ang ordinansa bahin sa mga laaw nga iro sa syudad

TUNGOD sa nagkataas ang kaso sa pagpamaak sa mga laaw nga iro nga naglatagaw sa kadalanan sa syudad, hinungdan nga kanunay taas ang linya diha sa City Health Department sa mga tawo nga magpabakuna sa anti-rabies, gisugyot ni Konsehal Bernie Esparcia, chairman sa Komite sa Climate Change Adaptation and Mitigation and Disaster Risk Reduction, ang hugot nga pagpatuman sa balaod batok sa mga laaw nga iro nga naglatagaw sa kadalanan.

Kini ang unod sa special report ni Konsehal Esparcia atol sa sesyon niadtong Lunes nga gidumala ni Bise Mayor Bebot Rodriguez.

Sumala ni Esparcia nga matag semana mokabat sa kapin sa gatus ang natala nga madakpan nga laaw nga mga iro ug madala sa city pound area dihas Barangay Balubal diin gikabalaka niya nga daling mapuno ug wala nay mabutangan.

Gani gipasalamatan ni Konsehal Esparcia nga adunay pipila ka nagpakabanang pribadong sektor nga  misabot ug mi-donar alang sa mga  pagkaon sa mga iro.

Niini gisugyot ni Esparcia nga mahingusgan ug mapalambo ang ordinansa nga nagsita sa lagda aron mapahinumduman ang tag-iya sa mga iro sa ilang responsibilidad sa pag-atiman ug paghatag gahum sa mga kabarangayan pagpatuman sa maong balaod.

Ang maong taho giduso ni Bise Mayor Bebot Rodriguez ngadto sa Komite sa Agriculture ni Konsehal Jay Roa Pascual ug sa Komite sa Panglawas ni Konsehal Malou Gaane alang sa dugang pagtuon ug rekomendasyon.