Esparcia misugyot mapadali pagkompleto sa road maintenance projects

SI Konsehal Bernie Esparcia naninguha karon nga mapadali ang pagkompleto sa mga gitrabahong dalan dinhi sa syudad.

Kini ang unod sa gidusong sugyot ordinansa sa konsehal sa tinguha nga maminusan ang kapiot nga dagan sa trapiko ug mahimong hamugaway ang pag-agi sa mga motorista dinha sa mga dalan nga kasamtangang gitrabaho.

Matod niya nga mahinungdanon kaayo ang insaktong pagmintinar sa kadalanan aron mapreserbar ang orihinal nga kondisyon, maprotektahan ang kasikbit nga mga kabtangan ug matagamtaman ang hamugaway nga pagbyahi sa katawhan paingon sa ilang tagsa tagsa ka destinasyon.

Apan matod pa ang kalangan sa pagkompleto sa mga gitul-id nga dalan nakahatag og kahasol sa mga motorista ug nakaamot sa labihan nga kapiot sa dagan sa trapiko.

Niini, malaumon si Esparcia nga pinaagi sa sugyot ordinansa mapadali ang pagkompleto sa mga gipatumang road maintenance projects sa dakbayan. (SP/JRGalano)