Esparcia misugyot malakip taxi operators sa GrabCar operation

GISUGYOT ni Konsehal Malvern Esparcia nga kun mahimo malakip nga mga sakop sa operasyon sa GrabCar ang mga taxi operators aron dili ma-apektuhan ang ilang kinitaan kun matugotan nang mag operate ang GrabCar dinhi sa syudad.

Kini ang panahum ni Esparcia atol sa tigom sa komite sa Public Utilities and Transportation ni Konsehal Romeo Calizo human gituki ang aplikasyon sa Mindanao Grab Philippines.

Matud sa konsehal nga pabor siya sa pagsulod sa maong kompanya ilabina na kay highly urbanized city ang Cagayan de Oro ug kinahanglan na usab nga mapalambo ang natad sa transportasyon pinaagi sa mga bag-o ug modernong teknolohiya.

Apan kinahanglan usab nga tun-an nga walay mapihig ilabina ang mga lokal nga taxi operators, sumpay ni Esparcia.

Siya midugang nga pipila na ka mga dagkong syudad sa nasud ang naggamit sa GrabCar ug nakita nga luwas alang sa mga sumasakay ug dali usab nga matawag panahon sa panginahanglan.

Niini gisugyot ni Esparcia nga ipa-ilawom sa seminar ang mga local taxi aron masunod ang mga gabayan nga gipatuman sa GrabCar Phils. Dako ang iyang pagtuo nga walay madehado kun ang tanan makigtambayayong ug magtinabangay alang sa kaayuhan sa tanan.