Esparcia misugyot ma-regulate mga food parks

SI Konsehal Bernie Esparcia misugyot sa pagpanday sa insaktong palisiya nga maggiya sa operasyon sa mga food parks dinhi sa syudad.

Kini ang unod sa special report sa konsehal sa sesyon sa konseho niadtong Lunes nga gidumala ni Bise Mayor Bebot Rodriguez human iyang nabasa ang post sa City Information Office (CIO) nga adunay mga stall owners sa parking lot sa usa ka hotel nga naisyohan og Ordinance Violation Receipt (OVR) sa Regulatory and Compliance Board (RCB) tungod kay walay mga business permit.

Sa gihimong pakisayod ni Esparcia, nasayran nga ang organizer o’ gadumala sa maong food park nagpasalig nga sila ang moproseso ug motrabaho sa permit sa mga stall owners.

Buot niyang maprotektahan ang gagmayng stall owners nga dili maataw-ataw ang ilang pagnegosyo ilabina nga kini ilang kapanginabuhian gawas pa nga nakatabang usab sila sa turismo tungod kay nakadani sa mga dumuduong.

Hinoon, gipasidunggan sa konsehal ang RCB tungod sa gihimong aksyon apan sa laing bahin buot usab niya nga maprotektahan ang mga gagmayng negosyante kinsa naningkamot sa ilang kinabuhi hinungdan nga iyang gisugyot nga makamugna sa palisiya alang sa maong katuyuan.

Ang special report ni Esparcia giduso ni Bise Mayor Bebot Rodriguez ngadto sa Komite Trade and Industry ni Konsehal George Goking alang sa dugang pagtuon ug rekomendasyon.