Esparcia mipasalamat sa gipahigayong seminar sa DILG

DAKO ang pasalamat ni Konsehal Bernie Esparcia, vice chairman sa komite sa arbitration, sa kahigayonan nga gihatag kanilang mga sakop sa konseho nga makakat-on sa parliamentary rules and procedures.

Kini ang gibutyag sa konsehal human gipahigayon ang seminar nga gipasiugdahan sa Department of Interior and Local Government (DILG) mahitungod sa parliamentary procecures and effective local legislation.

Matod sa konsehal nga daghan kaayo siya og nakat-onan nga seguradong makatabang panahon sa sesyon sa konseho ug mga tigom sa nagkadaiyang komite.

Lakip sa natun-an sa konsehal sa maong seminar mao nga labaw pirme ang balaod itandi sa internal rules sa konseho, mahimong isumbong sa mga konsehal ang mga opisyal sa barangay nga gabuhat sa dili maayo, ang ordinansa kinahanglan nga moagi sa una, ikaduha ug ikatulong pagbasa ug kinahanglan nga kini basahon aron makasabot ang katawhan ug daghan pang uban.

Malaomon si Esparcia nga pinaagi sa iyang mga nakat-unan sa maong seminar mahimo siyang epektibo sa iyang trabaho isip magbabalaod ug opisyal sa syudad. (SP/JRGalano)