Esparcia mihangyo masayo pag-release sa health emergency allowance

Hugot nga gihangyo ni Konsehal Bernie Esparcia, chairman sa komite sa climate change, nga kun mahimo mapasayo ang pagtunol sa Health Emergency Allowance (HEA) ngadto sa mga eligible health care workers ug mga non health care workers nga nagsilbi niadtong panahon sa pandemya sa Covid 19.

Kini ang panawagan sa konsehal sa milabayng sesyon sa konseho nga gidumala ni Bise Mayor Bebot Rodriguez human giuyonan ang ordinansa na nagcompirma ug nagpalig-on sa Memorandum of Agreement (MOA) tali sa kagamhanan sa syudad ug Center for Health Development -Northern Mindanao , (CHD-NM) alang sa pagrelease sa maong allowance.

Gipasabot ni Esparcia nga subay sa giuyonang MOA mahatag ang benepisyo sa dili pa mag-Disyembre ning tuig hinungdan nga iyang gihangyo nga kun mahimo mapasayo kini ug dili na maabtan pa sa Disyembre tungod kay dugay usab nga gipaabot ang mga nagsilbing mga kawani.

Nanghinaot usab ang konsehal nga mahatag na kini sa labing daling panahon.

Segurado ako nga naminaw ang mga health workers nga eligible ani ingon man mga non-health care workers nga kuyog nga nagsilbi niadtong panahon sa Covid-19 ug malipay nga madawat na nila ang bugti sa ilang panerbisyo, pamahayag ni Esparcia.