Esparcia mihangyo ma-iwas sa peak hours pag-deliver diha’s mga tindahan

Hugot nga gihangyo ni Konsehal Bernie Esparcia nga mahatagan og pagtagad ang mga salakyan nga gipanag-iyahan sa mga tindahan sama sa hardware, food chains ug uban pa nga gakarga ug gadiskarga sa ilang mga stocks nga sayo pa kaayo.

Kini ang unod sa special report sa Konsehal sa sesyon sa Konseho niadtong Lunes nga gidumala ni Bise Mayor Jocelyn Rodriguez.

Matod ni Esparcia nga iyang namatikan nga adunay mga delivery trucks nga sayo pa sa buntag nga gababag na sa dalan kay gadiskarga ug gakarga sa ilang mga stocks nga usa sa hinungdan sa kapiot nga dagan sa trapiko.

Gipasabot sa konsehal nga unta kining peak hours gikan sa alas 6 ngadto sa alas 8 sa buntag ug gikan sa alas 5 hapon paingon sa alas 7 sa gabii. Dili unta nila i-atol ang ilang pagdiskarga ug pagkarga sa ilang mga stocks aning mga orasa aron dili makadugang sa kapiot nga dagan sa trapiko.

Niini, gisugyot ni Esparcia nga marepaso ang ordinansa aron matun-an ang angayang oras aning mga delivery trucks nga magkarga og magdiskarga dinha sa mga tindahan.